काठमाडौं– निर्देशक ओम प्रतीकको निर्देशनमा निर्माण हुने नयाँ नेपाली फिल्म ‘मोहर’ मा अभिनेत्रीको रूपमा बेनिशा हमाल भित्रिएकी छिन् । निर्माण संस्थाले शुक्रवार अभिनेत्री हमाललाई मुख्य अभिनेत्रीको रुपमा अनुबन्ध गरेको हो । निर्देशक प्रतीकका अनुसार अभिनेत्र हमालसंग शुक्रवार नै कागजी सम्झौतासमेत गरिएको छ । यो संगै अब यो फिल्ममा पल शाह, नीति शाह, अर्जुनजंग शाही तथा बेनिशा हमालको मुख्य भूमिका रहने निश्चित भएको निर्देशक ओम प्रतिकले कलाकर्मीलाई जानकारी दिएका छन् ।

 चार जना योग्य कलाकारको सहभागिताले ‘मोहर’ को लाइनअप बलियो भएको निर्देशक प्रतिकको तर्क छ।निर्देशक ओम प्रतिकले दुई महिनाअघि एउटा पोस्टर सार्वजनिक गर्दै यो फिल्म निर्देशन गर्ने घोषणा गरेका थिए । नीतिसंगै अभिनय गर्ने एक जना अभिनेत्री तथा एक जना अभिनेताको खोजि भइरहेको छ । निर्देशक प्रतिकका अनुसार ‘मोहर’ नेपाली समाजको ऐनाको रुपमा प्रस्तुत हुनेछ । उनी भन्छन् – ‘हामीले फिल्मको स्लोगन नै ‘अ स्टोरी बेस्ड अन अनरिटन रुल्स’ बनाएका छौं, अर्थात समाजमा नलेखिएको एउटा नियमका बारेमा आधारित फिल्म ।’

फिल्म मेकर्स प्रालिको ब्यानरमा बन्ने यो फिल्मका निर्माता चुम्बन जंग शाही हुन् । दिपेन बस्न्यातले छायांकन गर्ने यो फिल्ममा कुमार महर्जनको द्वन्द निर्देशन रहने छ । कमेडी, एक्सन, सोसल ड्रामा तथा लभ स्टोरीसहितको जनरामा बन्ने यो फिल्मको छायांकन आगामी माघ महिनादेखि प्रारम्भ गरिने निर्माण पक्षको योजना छ । यो फिल्ममा सुरेश अधिकार तथा एसडी योगी तथा प्रमोद ढुंगाना र हर्क साउद गीतकारको रुपमा रहने छन् । फिल्मको प्रोडक्सन डिजाइन भने लक्ष्मण राज पौडेलको रहने छ । निर्माण व्यवसायी चुम्बन जंग शाहीले ‘मोहर’ को कथा तथा स्क्रिप्ट अत्यन्तै मन पराएर यो फिल्म निर्माण गर्न लागेको बताएका छन् ।