काठमाडौँ । चलचित्र विकास बोर्डको रित्त अध्यक्ष पदका लागि अभिनेत्री करिस्मा मानन्धरले पनि निवेदन दिएकी छिन् । अभिनेत्री मानन्धरले सञ्चार तथा सूचना प्रविधि मन्त्रालय पुगेर आफ्नो निवेदन दर्ता गराएकी हुन्।

मानन्धरले निवेदन दिएसँगै बोर्ड अध्यक्षका लागि अहिलेसम्म तीन जनाको आवेदन परेको छ । यसअघि अध्यक्षका लागि निर्देशक तथा सञ्चारकर्मी दिनेश डिसी र राष्ट्रिय नाचघरमा पूर्वमहाप्रवन्धक राजेश थापाले निवेदन दर्ता गराएका थिए । निवेदन दिने तीनै जना नेकपा एमाले निकट कलाकर्मी हुन् । 

गत साउन ९ गते भुवन केसीको दुई वर्षे कार्यकाल पूरा भएसँगै रिक्त रहेको अध्यक्ष पदका लागि गत साउन १६ गते सञ्चार तथा सूचना प्रविधि मन्त्रालयले दरखास्त आह्वान गरेको थियो । आवेदन दिने मिति बुधबारसम्म रहेको छ । आवेदन दिने मिति सकिएपछि मन्त्रालयले कार्ययोजना, प्रस्तुतीकरण र अन्तरवार्ता दिनका लागि सूचना जारी गर्नेछ । त्यसपछि, मन्त्रालयले आवेदन दिएका व्यक्तिहरूको नाम मन्त्रिपरिषद्मा सिफारिस गर्नेछ। मन्त्रीपरिषद्ले ती नामबाट एक जनालाई विकास बोर्डको अध्यक्षमा नियुक्त गर्नेछ ।