काठमाडौँ । नेपाल एडभेन्चर एक्स्पोको पहिलो संस्करणको सफलतापछि दोस्रो संस्करण पनि आयोजना हुने भएको छ ।

एआर भेन्चर्स को आयोजनामा ‘नेपाल एडभेन्चर एक्स्पो’ को आयोजना यही सेप्टेम्बर २८ तारिख शानिबारको दिन बिहान १० बजेदेखि साँझ ६ बजे सम्म नागपोखरीस्थित अरण्य बुटिक होटलमा आयोजना हुने कार्यक्रमका आयोजक सोनाम जाङ्बु शेर्पाले बताए । कार्यक्रमलाई नेपाल पर्यटन बोर्डले सहकार्य र प्रवर्द्धन गर्ने छ भने इन्टरनेट पार्टनरमा क्लासिटेक, भेन्यु पार्टनरमा अरण्य बुटिक होटल र डिजाइन पार्टनरमा सत्य मिडिया कोलेभोरेटिभ रहेका छन् ।

यसअघि नेपालमै पहिलो पटक ‘नेपाल एडभेन्चर एक्स्पो’ को पहिलो संस्करण दरबारमार्गस्थित अन्नपूर्ण होटलमा सफलतापूर्वक कार्यक्रम सम्पन्न गरिएको थियो । नेपालको भौतिक ,सांस्कृतिक तथा प्राकृतिक सौन्दर्यको प्रवर्द्धन, पद–यात्रा, ट्रेकिंङ्ग, हिमाल आरोहण र विभिन्न साहसिक पर्यटकिया गतिविधिहरूमा प्रयोग हुने स्वदेशी तथा विदेशी ब्रान्डका सामानहरूको प्रदर्शन, किनमेल र नेपालीहरूलाई साहसिक पर्यटन गतिविधिहरूमा प्रोत्साहित गर्ने उद्देश्य सहित  गत वर्ष नै नेपालमै पहिलो पटक ‘नेपाल एडभेन्चर एक्स्पो’ को आयोजना गरेर  यस पटक पनि सो उद्देश्यसहित दोस्रो संस्करण लिएर आएका शेर्पाको भनाइ छ ।

यस पटकको एक्स्पोमा पनि एक सय भन्दा बढि ब्रान्डका ५० वटा स्टलसहरु राखिने छन्। शेर्पाका अनुसार  पहिलो संस्करण राम्रो भएकाले पनि  दोस्रो संस्करण आयोजना गर्न अझ हौसला मिलेको  उनले बताए  । यो दोस्रो संस्करणको पनि  भव्य सफलतापूर्वक सम्पन्न गर्ने  विश्वास लिएको शेर्पाको भनाइ छ ।

उनले भने, ‘पहिलो संस्करणमा हामीले ५० वटा प्रदर्शकहरू राखेका थियौँ । सो कार्यक्रममा दुई हजार पाँच सय भन्दा बढी नेपाली व्यवसायी, ग्राहक तथा अन्तर्राष्ट्रिय पर्यटकहरूले एक्सपोको भ्रमण गरेका थिए । एक्स्पो एक दिनको प्रदर्शनी कार्यक्रम हो । उक्त एक्स्पोमा पिक प्रमोसन ट्रेडिंग, हिमालयन सिङ्गल ट्रयाक, स्विचव्यक नेपाल, इनिसियाटीभ आउटडोर, एक्सटेर्र नेपाल, द लस्ट रिसोर्ट, हाइग्राउन्ड एड्भेन्चर, बलुन नेपाल, एपिक माउन्टेन बाइक, बि. एन्ड बि. अस्पताल, द बाइक फर्म, फ्लाईङ वन्डरस् प्याराग्लाइडिङ स्कुल, हुम्टो, ग्रभिटी नेपाल, पोखरा एण्डुरो, हिमालयन मेडिक्स, द नर्थ फेस्, आरोहण, काठमाडौँ बाइक स्टेशन, हिरो मोटो कर्प नेपाल, लुक्ला आउटडोर, सत्य मिडिया कलेक्टिभ, शान्त नेपाली प्रडक्शन, डुलुवा आउटडोर्स, हिमालयन एभरेस्ट, स्योसल टुर्स, ल्युमिन एन्ड नेपाल, स्न्याक अन नेपाल, श्रेडर्स, ट्रेलमन्डु, नेपाल ट्रेल सिरिज, नोभेल्टिज इन्टरनेशनल, एड्भेंजी, सप्लाई सपोर्ट, आशस हेल्थ केर, गेको गेयर, द पम्प, क्लकवर्क ट्रेल्स, हाइटेड नेपाल, ८८५० मिडिया लगायतको स्टलहरु राखिने छ ।

यस पटक पनि दुई हजार पाँच यस भन्दा बढीलाई भ्रमण गराउने योजना रहेको शेर्पाले बताए । उक्त एक्स्पोमा ५० देखि एक सय वटा राष्ट्रिय तथा अन्तर्राष्ट्रिय ब्राण्डको स्टल राखिने छ । साथै एक्स्पोमा राखेका विभिन्न ब्रान्डले आफ्नो ब्रान्डलाई अन्वेषण गर्ने प्लेटफर्म पाउने उनले जानकारी दिए । पर्यटन क्षेत्रमा आबद्ध व्यक्तित्ववाहरुबाट अनुभवका कथा, यात्राको बारेमा कार्यशाला र साहसिक पर्यटन सम्बन्धी वृत्तचित्र प्रदर्शन गरिने अजय नरसिंह राणाले जानकारी दिए ।

आयोजकका संस्थापक अजय नर्सिङ राणाले भने, ‘एक दशकभन्दा बढी समयदेखि साहसिक र खेलकुद कार्यक्रमहरू आयोजना गर्नमा विशेषज्ञता हासिल गरिसकेपछि, हामीले २०२१ मा नेपाल बाई साइकल एक्स्पो सुरु गरेका थियौँ । यो अनौठो एक्स्पो नेपाली साइकल उद्योग भित्रका निर्माता, वितरक र सेवा प्रदायकहरूका लागि विशेष प्लेटफर्मको रूपमा रहेको छ । पहिलो दुई संस्करणको सफलताले हामीलाई हाम्रो क्षितिज विस्तार गर्न र बाहिरी साहसिक दृश्यको लागि अर्को कार्यक्रमको आयोजना गर्न प्रेरित गराएको हो ।’

राणाले थपे, ‘नेपाल एडभेन्चर एक्स्पो एक वार्षिक कार्यक्रम हो, जसले साहसिक, बाहिरी सौन्दर्यप्रेमी, यात्री र उद्योग व्यवसायीहरूलाई आकर्षित गर्ने  छ । साहसिक खेलहरू, यात्रा गन्तव्यहरू, क्याम्पिङ गियर, आउटडोर उपकरणहरू, चरम खेलहरू (एक्सटिम स्पोर्टस) र वेलनेससँग सम्बन्धित नवीनतम र सबैभन्दा राम्रो उत्पादनहरू, सेवाहरू, र अनुभवहरू प्रस्तुत गर्न यो एक विशेष कार्यक्रम हो ।’

नेपालीहरूको महानपर्व दसैँ र तिहारको बिदा अक्टोबरमा सुरु भएसँगै अहिले धेरै नेपालीहरूले विभिन्न साहसिक बिदा मनाउन यो समय रोज्न थालेका छन् । यस अवधिमा ग्राहकहरूले आउटडोर गतिविधिहरूको लागि र आफ्नो गन्तव्य, कपडा, सामान र अन्य सम्बन्धित सामाग्रीहरू सबै एकै ठाउँमा पाउन सकिने र सहज हुने शेर्पाको भनाइ छ ।

तस्बिरहरू;