नयाँ दिल्ली । उत्तर प्रदेशको उन्नावमा भएको सडक दुर्घटनामा १८ जनाको मृत्यु भएको छ । आगरा–लखनउ एक्सप्रेस वेमा उन्नावबाट आइरहेको स्लीपर बस दूधको ट्यांकरसँग ठोक्किएको थियो । यस घटनामा बसमा सवार १८ जनाको मृत्यु भएको छ । अरू १९ जना घाइते भएका छन् । दुर्घटना उन्नावको गढा गाउँ नजिकै भएको थियो । दुर्घटनामा मृत्यु हुनेमा १४ पुरुष, २ महिला र २ बालबालिका रहेका छन् ।प्रहरीका अनुसार ट्यांकरलाई ओभरटेक गर्ने क्रममा बस दुर्घटनामा परेको थियो । ट्यांकरसँग ठोक्किएपछि बस एक्सप्रेस वेमा पल्टिएको थियो । जसका कारण बसमा सवार धेरै यात्रुको घटनास्थलमै मृत्यु भएको छ । 

समाचार एजेन्सी पीटीआईका अनुसार स्लीपर बस बिहारको सीतामढीबाट मोतिहारी हुँदै दिल्ली गइरहेको थियो । घाइतेहरूलाई उपचारका लागि उन्नावको बांगरमाउ सीएचसीमा पठाइएको छ । केही गम्भीर घाइते यात्रुलाई उपचारका लागि लखनउ लगिएको छ ।दुर्घटनाप्रति दुःख व्यक्त गर्दै उत्तर प्रदेशका मुख्यमन्त्री योगी आदित्यनाथले जिल्ला प्रशासनलाई घटनास्थलमा पुग्न र राहत कार्यलाई तीव्रताका साथ अघि बढाउन निर्देशन दिएका छन् । उन्नाव जिल्ला मजिस्ट्रेट गौरांग राठीका अनुसार दुर्घटना बिहान ५ः १५ बजे भएको थियो ।यो एक निजी स्लीपर बस थियो । प्रारम्भिक अनुसन्धानमा बसको गति उच्च रहेको देखिएको थियो । दुर्घटनामा ज्यान गुमाउनेमा उत्तर प्रदेश र बिहारका धेरै थिए ।