काठमाडौँ । अभिनेत्री कविता नेपाली यतिबेला सगरमाथा बेस क्याम्पमा छिन् । संसारकै अग्लो शिखर सगरमाथा आरोहण गर्ने उद्देश्यसहित विभिन्न तयारीका लागि उनी अहिले बेस क्याम्प पुगेकी हुन् । ‘सगरमाथा चढ्नु अघि अन्य हिमालहरु चढ्नुपर्ने र आवश्यक बिभिन्न तालिम समेत लिनुपर्ने रहेछ’, नेपालीले भनिन्– ‘त्यसका लागि अहिले सगरमाथा बेस क्याम्पमा तयारी गर्दैछु ।’

उनले पहिलो पटककै सगरमाथा आरोह गर्ने भने होइन । तयारीपछि उनी केही साना हिमाल चढ्नेछिन् र त्यसपछि सगरमाथा आरोहण गर्ने उनले सुनाइन् । कविता फिल्म ‘एक्लो’ की अभिनेत्री हुन् । उनलाई सगरमाथा आरोहणको रहर त्यतिबेला जागेको हो । जतिबेला उनी ‘एक्लो’ छायांकनको लागि अपर मुस्ताङ पुगेकी थिइन् ।

कवितालाई सगरमाथा आरोहणका लागि फिल्म ‘एक्लो’ युनिटले समेत सहयोग गर्ने भएको छ । आफ्नो फिल्मको अभिनेत्री सगरमाथा चढ्न लाग्दा निकै खुसी महसुस भएको ‘एक्लो’ का कार्यकारी निर्माता विनोद सुवेदी क्षितिजले बताए । उनले भने ‘कविताका लागि हामी सक्दो सहयोग गर्नेछौ ।’ ‘एक्लो’ कविताको डेब्यु फिल्म हो । डान्सिङ्ग रियालिटी शो विजेता समेत रहेकी नेपालीले थुप्रै म्युजिक भिडियो र वेब सिरिजमा काम गरिसकेकी छन् । अहिले पोस्ट प्रोडक्सनमा रहेको ‘एक्लो’ प्रदीप शाहीले निर्देशन गरेका हुन् ।