काठमाडौं । सभामुख देबराज घिमिरेले विचार र बुझाईको अभाव हुनेहरुले संघीयता चाहिँदैन भन्ने टिप्पणी गरिरहेको बताएका छन् । 

शुक्रबार काठमाडौंमा आयोजित राष्ट्रिय प्राकृतिक स्रोत तथा वित्त आयोग स्मारिका विमोचन कार्यक्रममा बोल्दै उनले संघीयता कार्यान्वयनमा भएका योगदानहरुको बारेमा समिक्षा गर्नको साटो संघीयता नै चाहिँदैन भन्ने खालका गलत टिप्पणीहरु भइराखेको बताए । उनले भने, ‘आज संघीयता चाहिँदैन भन्ने खालको टिप्प्णीहरु भइराखेको छ । मेरो व्यक्तिगत रुपमा के बुझाई छ भने, संघीयलाई कार्यान्वयन गर्न हामीले गर्नुपर्ने कामहरु कति गर्याे,संघीयतासँग सम्बन्धित निकायहरुलाई बलियो पार्ने, कानुन बनाउनेदेखि कार्यान्वयन गराउने कामहरु कति गर्याे । काम गर्दा के अनुभव लिऔं यो पाटोमा सबैको ध्यान जानु पर्ने गएन । खालि संघीयता व्यवहारिक भएन यसको दुरुपयोग बढि भयो भन्ने जस्ता कुरा भएको छ । यसमा म विल्कुल फरक मत राख्छु । यो कुरा विचार र बुझाईको अभावमा आइरहेका छन् ।’

उनले तुलनात्मक रुपमा अलि बढि महत्व भएको राष्ट्रिय प्राकृतिक स्रोत तथा वित्त आयोगको प्रतिवेदन संसदमा जति मात्रामा छलफल हुनु पर्ने हो त्यो भन्दा ज्यादै न्यून रहेको गुनासो गरे । उनले भने, ‘यो आयोगको तुलनात्मक रुपमा आफ्नै महत्व छ । आयोगका प्रतिवेदनहरु संसदमा छलफल गर्ने वहस गर्ने त्यसलाई सुधार्ने र त्यसका कार्य क्षेत्र अधिकार क्षेत्र मिलाउने, कानुन बनाउने, बनेका कानुनहरुको परिमार्जन गर्ने तमाम कामको जिम्मा लिएको संसदमा जुन मात्रामा यसका प्रतिवदेनहरुको छलफलहरु हुनु पर्ने हो । त्यो नभइरहेको स्थिति छ । त्यसलाई परिमार्जन गर्न जरुरी छ । त्यसको लागि आयोग आफैले पनि प्रयत्न गरिराखेको छ ।’